ສະບາຍດີ
ໜັງຝຼັ່ງ ສອນໃຫ້ຄົນ ມີເຫດ ແລະ ຜົນ
ໜັງຈີນ ສອນໃຫ້ຄົນມີຄວາມສາມາດ ໂດຍການເຝິກວິຊາ ກຳລັງພາຍນອກ ແລະ ກຳລັງພາຍໃນ
ໜັງອິນເດຍ ໜ້າຈະສອນຄົນປະມານວ່າ ບໍ່ມີຫຍັງເປັນໄປບໍ່ໄດ້ ໂດຍການໃຊ້ "ກວ້າຍຫອມ" ເປັນອາວຸດ ເພື່ອຂ້າຄົນ ໃນບົດເລື່ອງ ແລະ ວິທີຈີບສາວ ໂດຍການແລ່ນຮ້ອງເພງ ອ້ອມຕົ້ນໄມ້ໃຫຍ່
ນິໄສຂອງໜັງ ສະທ້ອນເຖິງນິໄສຂອງຄົນໃນປະເທດນັ້ນໆ
ທີ່ຈິງມັນບໍ່ຄວນເປັນເລື່ອງທີ່ຊີຣຽດສ໌ ແຕ່ເປັນຫຍັງເຮົາຈຶ່ງຊີຣຽດສ໌ທຸກຄັ້ງທີ່ນຶກເຖິງບັນຫາເສດຖະກິດໃນປະເທດ ທີ່ເຊື່ອມໂຍງກັບບັນຫາ ໂລກາພິວັດ "ສິ່ງແວດລ້ອມພາຍນອກ ກະທົບພາຍໃນ"
ໂລກາພິວັດ ເປັນເລື່ອງທີ່ລະອຽດອ່ອນຫຼາຍ ເຂົ້າໃຈງ່າຍໆ ຄືການສ້າງ Brand ໃຫ້ກັບປະເທດ ຫຼື ທຸກຄົນຮູ້ດີໃນນາມ "ສົງຄາມເສດຖະກິດ"
"ໂລກາພິວັດ" ລະອຽດອ່ອນແບບນີ້ ແລ້ວເຮົາຈະຮັບມືກັບມັນດ້ວຍວິທີໃດ?
ກ່ອນອື່ນໝົດ ຕ້ອງມາຮູ້ກ່ອນວ່າ ມະນຸດເຮົາ ເກີດມາຈາກຫຍັງ
ສະໝອງຄົນເຮົາ ຈະຖືກສ້າງຂຶ້ນ ຈາກສິ່ງແວດລ້ອມ ທີ່ພົບເຫັນ ແລະ ສຳພັດ ກາຍເປັນຈິດໃຕ້ສຳນຶກ ທີ່ສ້າງຄວາມຄິດ-ນິໄສໃຫ້ແກ່ຄົນຜູ້ນັ້ນ
ຖ້າເອົາເດັກນ້ອຍ ທີ່ເກີດຢູ່ເອເຊຍ ໄປເຕີບໃຫຍ່ແຖວຢູໂຣບພ໌ ເດັກນ້ອຍຄົນນັ້ນ ກໍຈະກາຍເປັນ ຄົນຢູໂຣບພ໌ ແບບອັດຕະໂນມັດ ນັ້ນຄືທຳມະຊາດຂອງຄວາມເປັນຄົນ ຫຼື ສັດມະນຸດ
ຖ້າສົມມຸດ ເຮົາເກີດຢູ່ສິ່ງແວດລ້ອມ ທີ່ມີຂໍ້ເສຍຕ່າງໆນາໆ ເຮົາກໍຈະໄດ້ຂໍ້ເສຍນັ້ນ ສ້າງເປັນເຮົາ ຂຶ້ນມາແບບອັດຕະໂນມັດ ໂດຍມອງຂ້າມຂໍ້ເສຍ ປົນເປກັບຂໍ້ດີຂອງເຮົາ ແບບບໍ່ຮູ້ໂຕ
ມະນຸດຈຶ່ງ ພະຍາຍາມແກ້ໄຂບັນຫາຂໍ້ເສຍນັ້ນອອກໄປ ໂດຍການສ້າງສະຖາບັນການສຶກສາ ຫຼື ການສ້າງສິ່ງຍຶດໜ່ຽວຈິດໃຈມະນຸດດ້ວຍກັນໄວ້ ນັ້ນຄື "ຄວາມເຊື່ອ-ຄວາມຮູ້" ສາມາດ ແຍກແຍະບັນຫາ ໂດຍສ້າງສອງຄຳນີ້ຂຶ້ນມາ
"ດີ ແລະ ຊົ່ວ" - "ຄວາມຮູ້ ແລະ ບໍ່ຮູ້"
ດີ: ຄືການແກ້ໄຂບັນຫາ
ຊົ່ວ: ຄືບັນຫາ
ຄວາມຮູ້: ຄືການແກ້ໄຂບັນຫາ
ບໍ່ຮູ້: ຄືບັນຫາ
ເປັນການແກ້ໄຂ ທີ່ອາໄສລະບົບມະນຸດສ້າງຂຶ້ນມາເອງ ມາຊ່ວຍດຶງສັກກາຍະພາບຂອງມະນຸດດ້ວຍກັນເອງ
ປະເທດໃດມີລະບົບ ທີ່ດຶງສັກກາຍະພາບໄດ້ດີກ່ວາ ປະເທດນັ້ນກໍຈະໄດ້ປຽບກ່ວານັ້ນເອງ.
ແຕ່ການຈະດຶງ ສັກກາຍະພາບທັງໝົດ ຂອງມະນຸດອອກມາໄດ້ນັ້ນ ລະບົບຊ່ວຍບໍ່ໄດ້ທັງໝົດ ຕ້ອງອາໄສ ການຮຽນທີ່ຈະຮູ້ ກັບການຮັບມືຂອງໂລກາພິວັດ ໃຫ້ໄດ້ເທົ່ານັ້ນ ແລະ ມັນເປັນສິ່ງທີ່ລຳບາກສຸດໆ ຜິດທຳມະຊາດ ນິໄສຂອງມະນຸດເຮົາ
ສະນັ້ນແລ້ວ ໂລກາພິວັດ ຈຶ່ງເປັນເລື່ອງທີ່ລະອຽດອ່ອນທີ່ສຸດ ທີ່ສັງຄົມບ້ານເຮົາ ຈົ່ງຊ່ວຍກັນສຶກສາມັນຢ່າງລະອຽດ ຮຽນຮູ້ແລ້ວປັບໃຊ້ມັນຢ່າງຈິງຈັງ ຖ້າສູ້ກັບໂລກາພິວັດສຳເລັດໄດ້ນັ້ນ ການແກ້ໄຂບັນຫາຕ່າງໆນາໆ ໃນປະເທດຂອງເຮົາ ກໍຈະເຮັດໄດ້ໄວຂຶ້ນ ແລະ ມີປະສິດທິພາບສູງສຸດນັ້ນເອງ "ເສດຖະກິດບ້ານເຮົາ ອາດນຳໜ້າໝູ່ໄດ້"
ຂ້ອຍເຊື່ອວ່າ "ຄົນລາວກໍສ້າງຍານອາວະກາດໄດ້" ເພາະຄົນລາວ ກໍຄົນຄືກັນ
ພຽງແຕ່ ສີຜົມ-ສີຜິວ ຄືຜົນກະທົບ ທີ່ເກີດຈາກສິ່ງແວດລ້ອມຂອງພູມມີປະເທດ ສ່ວນນິໄສປາກເວົ້າ ຄືຜົນກະທົບ ທີ່ເກີດຈາກວັດທະນະທຳ ນັ້ນເອງ
ສະນັ້ນແລ້ວ ສິ່ງແວດລ້ອມ ຈຶ່ງມີສ່ວນເສີມສ້າງສັກກາຍະພາບ ຂອງມະນຸດໄປເຕັມໆ
ເອົາໃຈຊ່ວຍການແກ້ໄຂບັນຫາ ການນຳບ້ານເຮົາ ເພາະເຊື່ອວ່າ ເພິ່ນກໍເຫັນບັນຫານີ້ຢູ່ ແລະ ພະຍາຍາມແກ້ໄຂ ສ້າງສິ່ງແວດລ້ອມ ໃນປັດຈຸບັນໃຫ້ດີຂຶ້ນ
ສະນັ້ນ ຈະດີກ່ວາ ຖ້າສັງຄົມບ້ານເຮົາ ຮຽນຮູ້ທີ່ຈະເຂົ້າໃຈບັນຫານີ້ດ້ວຍຕົນເອງ ແລະ ມີພູມຕ້ານທານ ຕໍ່ໂລກາພິວັດໃນໂລກນີ້ໄດ້ໄວຂຶ້ນ
ຢາກເຫັນຄົນບ້ານເຮົາ ສ້າງນະວັດຕະກຳໃໝ່ໆເກີດຂຶ້ນຫຼາຍໆ ເຂົາເຮັດໄດ້ ເຮົາກໍເຮັດໄດ້ດີກ່ວາ ເລີ່ມຈາກຜູ່ຕາມ ກາຍເປັນຜູ່ນຳ ບໍ່ສວາຍທີ່ຈະເລີ່ມຄິດ ແລ້ວການກະທຳ ກໍຈະປ່ຽນໄປ ຈາກການຄົ້ນພົບຄວາມຄິດໃໝ່ໆ ດ້ວຍໂຕເຮົາເອງໄດ້ 😊
