ມີປຶ້ມມາແນະນຳ ຊື່ປຶ້ມວ່າ ສົງຄາມທີ່ບໍ່ມີວັນຊະນະ
ບາງຄົນອາດເຄີຍອ່ານປະຫວັດສາດມາຫລາຍຮູບແບບ ແຕ່ນີ້ຄືປຶ້ມປະຫວັດສາດທີ່ຄຶດວ່າ ຫລາຍຄົນຫນ້າຈະບໍ່ເຄີຍອ່ານ ເພາະນີ້ຄືປະຫວັດສາດວົງການແພດ ທີ່ຈັບປະເດັນເລື່ອງທີ່ມາຂອງຢາຕ້ານເຊື້ອ ປະຫວັດສາດຂອງໂຕຢາທີ່ເວົ້າໄດ້ວ່າ ປ່ຽນປະຫວັດສາດມະນຸດ ແລະເປັນສ່ວນນຶ່ງທີ່ເຮັດໃຫ້ນາຊີເຢຍລະມັນ ປະລາໄຊໃນສົງຄາມໂລກ
ປານນັ້ນພຸ້ນບໍ້?
ຫລັງອ່ານຈົບ ໄດ້ຮູ້ຫລາຍໆຢ່າງ ໄດ້ເຫັນສະພາບຊີວິດຂອງຄົນຍຸກທີ່ຍັງບໍ່ມີຢາຕ້ານເຊື້ອ ຍຸກທີ່ມະນຸດເຮົາຍັງບໍ່ຮູ້ວ່າເຊື້ອພະຍາດເປັນແນວໃດ? ນອກນັ້ນເຮົາຈະໄດ້ຕິດຕາມພາລະກິດລັບ ຂອງການຜະລິດຢາຕ້ານເຊື້ອ ທີ່ຕ້ອງແຂ່ງກັບເວລາໃນສົງຄາມໂລກຄັ້ງທີສອງ ເຮົາຈະໄດ້ຮູ້ເລື່ອງຢາຕ້ານເຊື້ອແບບລະອຽດ ເຊິ່ງການຕໍ່ສູ້ກັບພະຍາດນີ້ ມາຮອດປັດຈຸບັນເຮົາກໍຍັງເວົ້າໄດ້ວ່າ ນີ້ຄືສົງຄາມການຕໍ່ສູ້ທີ່ມະນຸດເຮົາບໍ່ມີມື້ຊະນະ
ອີກສິ່ງນຶ່ງທີ່ໄດ້ຈາກການອ່ານປຶ້ມນີ້ແມ່ນ ຄວາມງົມງວາຍທີ່ມີໃນສັງຄົມ ຄວາມເຊື່ອຜິດໆ ຫລັງອ່ານແລ້ວເຮັດໃຫ້ຮູ້ວ່າ ທີ່ສັງຄົມເຮົາຍັງມີເລື່ອງພວກນີ້ຢູ່ ກໍຍ້ອນວ່າວິທະຍາສາດຍຸກໃຫມ່ ທີ່ກ້າວຫນ້າແບບເຮົາເຫັນໃນປັດຈຸບັນນັ້ນ ຫາກໍມີມາບໍ່ຮອດທໍ່ໃດປີ ເຮັດໃຫ້ຄວາມເຊື່ອຄວາມຄຶດຜິດໆ ຍຶດຕິດກັບເລື່ອງວິຍານຜີສາງນາງຮ້າຍ ຍັງຄົງມີຢູ່ໃນສັງຄົມ ອ່ານເລື່ອງນີ້ແລ້ວ ເຮັດໃຫ້ໄດ້ເຂົ້າໃຈວ່າ ເຖິງເທັກໂນໂລຍີເຮົາຈະກ້າວຫນ້າໄປໄວປານໃດ ແຕ່ແນວຄຶດຄົນ ຍັງຄົງຫລ້າຫລັງ ແລະຕິດພັນກັບຊີວິດຮຸ່ນເກົ່າຢູ່.
