Goteddy ເປັນອີກໜຶ່ງທຸລະກິດທີ່ຕອນນີ້ຫຼາຍໆຄົນໃຫ້ຄວາມສົນໃຈລວມເຖິງຕົວຜູ້ຂຽນເອງ ເພາະບໍລິການນີ້ໄດ້ໃຫ້ຄວາມສະດວກສະບາຍ ແລະ ໄດ້ໃຫ້ຕົວເລືອກທີ່ຫຼາກຫຼາຍກັບຄົນທີ່ມັກກິນ ສຳລັບຄົນທີ່ຍັງບໍ່ຮູ້ວ່າໂກເທັດດີ້ແມ່ນຫຍັງມື້ນີ້ຜູ້ຂຽນຈະມາເວົ້າສູ່ຟັງວ່າມັນແມ່ນຫຍັງກັນແທ້ ເຊິ່ງຕາມທີ່ຜູ້ຂຽນໄດ້ຮູ້ມາ ໂກເທັດດີ້ແມ່ນ platform ຫຼື ແອັບພິເຄຊັ່ນ ທີ່ລວບລວມເອົາຫຼາຍໆຮ້ານດັງ ແລະ ຮ້ານແຊບໃນລາວມາໄວ້ບ່ອນດຽວກັນໃນແອັບພິເຄຊັ່ນ ໂດຍທີ່ວ່າຖ້າເຮົາຢາກສັ່ງອາຫານ ເຮົາຕ້ອງສັ່ງຜ່ານແອັບພິເຄຊັ່ນຂອງໂກເທັດດີ້ເທົ່ານັ້ນ ແລະ ໂກເທັດດີ້ຈະໄປຮັບອາຫານຢູ່ຮ້ານນັ້ນ ພ້ອມກັບມາສົ່ງໃຫ້ເຮົາຮອດບ່ອນທີ່ເຮົາຢູ່ ວິທີໃຊ້ງານຂອງແອັບນີ້ກໍງ່າຍຫຼາຍເຊິ່ງຂັ້ນຕອນກໍມີດັ່ງນີ້:
ດາວໂຫຼດແອັບໂກເທັດດີ້ ພ້ອມທຳການຕິດຕັ້ງ ແລະ ລົງທະບຽນເພື່ອເຂົ້າໃຊ້ແອັບພິເຄຊັ່ນ
ຖ້າຕ້ອງການຈະສັ່ງອາຫານໃຫ້ກົດປຸ່ມ TEDDY EAT ແລະ ສາມາດເລືອກຮ້ານອາຫານທີ່ເຈົ້າມັກໄດ້ເລີຍ
ຖ້າຕ້ອງການຈະຮູ້ວ່າຮ້ານນັ້ນມີເມນູຫຍັງແນ່ ພ້ອມກັບລາຄາຂອງອາຫານແມ່ນເທົ່າໃດ ໃຫ້ກົດເຂົ້າໄປທີ່ຊື່ຮ້ານ
ເມື່ອເຮົາໄດ້ຮ້ານອາຫານທີ່ຖືກໃຈແລ້ວ ໃຫ້ກົດເລືອກເມນູ ແລະ ກົດປຸ່ມເພີ່ມລາຍການ
ກວດຄືນເບິ່ງອາຫານທີ່ຕົວເອງສັ່ງໃນປຸ່ມເບິ່ງກະຕ່າສິນຄ້າ
ແລະ ກົດຢືນຢັນ ການສັ່ງຊື້ໄດ້ທັນທີ
ຫຼັງຈາກເຮົາກົດຢືນຢັນແລ້ວ ເຮົາສາມາດເບິ່ງສະຖານະອາຫານຂອງເຮົາໄດ້ທັນທີ
ເມື່ອອາຫານຂອງເຮົາມາຮອດ ກໍຈະມີສະຖານະວ່າ ສຳເລັດ
Review ອາຫານໃນເທື່ອນີ້
ສັ່ງຕອນ 11:30ຕອນສວາຍ ໄດ້ອາຫານໃນເວລາ 12:29 ໃຊ້ເວລາ 1ຊົ່ວໂມງພໍດີ ໄລຍະທາງຈາກຮ້ານມາຮອດບ່ອນຜູ້ຂຽນຢູ່ແມ່ນ 4,4KM ຈະວ່າໄວກະບໍ່ໄວ ແຕ່ກະບໍ່ຖືວ່າຊ້າເກີນໄປ ສ່ວນຄ່າສົ່ງໃນເທື່ອນີ້ ບໍ່ໄດ້ແພງເກີນໄປເລີຍ ໃນໄລຍະທາງ 4,4 KM ຕົກເປັນເງິນພຽງແຕ່ຈຳນວນ 14.000ກີບ ເທົ່ານັ້ນ
ເຊິ່ງຄັ້ງນີ້ບໍ່ແມ່ນຄັ້ງແລກທີ່ຜູ້ຂຽນໄດ້ລອງໃຊ້ GOTEDDY ແຕ່ເຄີຍໄດ້ລອງໃຊ້ມາຫຼາຍເທື່ອແລ້ວເຮັດໃຫ້ຮູ້ວ່າ ໂກແທັດດີ້ນັ້ນມີ ຂໍ້ດີ ແລະ ຂໍ້ເສຍ ປົນກັນໄປ ມື້ນີ້ເຮົາຈະເວົ້າເຖິງ2ຂໍ້ນີ້ໃຫ້ຟັງ ເຮົາມາເລີ່ມທີ່ຂໍ້ດີກັນກ່ອນເນາະ
ສຳລັບແອັບໂກເທັດດີ້ຂໍ້ດີມີຄື:
1. ສະດວກສະບາຍໃນການກິນອາຫານຫຼາຍຂຶ້ນເພາະບໍ່ຕ້ອງອອກໄປຊື້ເອງ
2. ອາຫານມາໄວຖ້າສັ່ງຢູ່ໃນເມືອງ ຫຼື ບ່ອນທີ່ເຂົ້າເຖິງງ່າຍ
3. ສາມາດເລືອກສັ່ງ ແລະ ເລືອກກິນຫຼາຍໆຮ້ານໄດ້ຜ່ານແອັບສັ່ງອາຫານ
4. ຈ່າຍຜ່ານ one pay ໄດ້ເລີຍຖ້າບໍ່ມີເງິນສົດ
5. ການບໍລິການຂອງພະນັກງານເຮັດໄດ້ດີພໍສົມຄວນ
6.ມີພາສາອັງກິດ ສຳລັບຄົນຕ່າງປະເທດ ແລະ ພາສາລາວສະບັບຄົນລາວພ້ອມ
ສຳລັບຂໍ້ເສຍຂອງແອັບເພິ່ນກໍມີເຊັ່ນດຽວກັນຄື:
1. ຖ້າໃຫ້ມາສົ່ງຢູ່ນອກເມືອງແນ່ ແມ່ນການບໍລິການຍັງຊ້າ
2.ຕາມຂໍ້1ຄືຖ້າຊ້າ ແລ້ວຖ້າເຮົາສັ່ງເຄື່ອງດື່ມແມ່ນຈະເຮັດໃຫ້ນຳ້ກ້ອນເປື່ອຍ ແລະ ເຄື່ອງດື່ມບໍ່ຄ່ອຍຫວານ ລວມເຖິງອາຫານອາດຈະເຊົາຮ້ອນ
3. ການເລືອກສັ່ງຫຼາຍໆຮ້ານພ້ອມກັນເຮັດໃຫ້ມີຄ່າສົ່ງທີ່ຂ້ອນຂ້າງສູງ
4. ໂມງທີ່ເຮົາຈະໄດ້ອາຫານແມ່ນບໍ່ຄ່ອຍແນ່ນອນ ຂຽນໃນເເອັບແມ່ນ 30-45 ແຕ່ຄວາມຈິງອາດຈະຊ້າກວ່ານັ້ນຫຼາຍ
ແຕ່ແນວໃດກໍຕາມແນ່ນອນວ່າທຸກໆຢ່າງ ມີຂໍ້ດີ ແລະ ຂໍ້ເສຍປົນກັນໄປ ທີ່ຜູ້ຂຽນອອກມາເວົ້າສູ່ຟັງໃນມື້ນີ້ ແມ່ນຄວາມຮູ້ສຶກທີ່ຜູ້ຂຽນໄດ້ລອງໃຊ້ ແລະ ຮູ້ສຶກຈາກສິ່ງທີ່ຜູ້ຂຽນເຫັນ ກໍບໍ່ຢາກໃຫ້ປັກໃຈເຊື່ອ100ເປີເຊັນ ເພາະແນ່ນອນວ່າແຕ່ລະຄົນອາດຈະເຈີບໍ່ຄືກັນ ບາງທີຂໍ້ເສຍທີ່ເກີດຂຶ້ນອາດຈະມີຜູ້ຂຽນຄົນດຽວທີ່ເຄີຍເຈີກໍເປັນໄປໄດ້ ໃຜເຄີຍລອງໃຊ້ບໍລິການຂອງໂກເທັດດີ້ໍມາເວົ້າສູ່ກັນຟັງໄດ້ເດີ້ວ່າເຄີຍເຈີແບບໃດແນ່
