ຫຼາຍໆຄົນທັງໝູ່ເພື່ອນ ຫຼື ລຸ້ນນ້ອງທີ່ຮຽນສາຍໄອທີ ກໍຍັງຄົ້ນຫາຕົນເອງຢູ່
"ບໍ່ຮູ້ວ່າຕົນເອງມີເປົ້າໝາຍວ່າຢາກເຮັດຫຍັງແທ້” ມື້ນີ້ກໍເລີຍມີຂໍ້ຄິດດີໆມາໃຫ້ອ່ານນຳກັນ
ເຈົ້າຂອງກະທູ້ກໍເປັນຄົນໜຶ່ງທີ່ເຄີຍພົບບັນຫານີ້ມາຕະຫຼອດເລີຍ ເພາະຕັ້ງແຕ່ເລີ່ມເຂົ້າຮຽນສາຍໄອທີມາ
ກໍໄດ້ລອງເຮັດຫຼາຍໆຢ່າງ ແຕ່ຍັງບໍ່ຖະນັດໄປທຸກຢ່າງຈົນສຸດທ້າຍຢາກເຮັດໄປທຸກຢ່າງພ້ອມໆກັນໃຫ້ຮູ້ໄປເລີຍ
(ອັນນິຊ່ວງໄຟຍັງແຮງໆ) ແຕ່ພໍມາຮູ້ໂຕອີກເທື່ອໜຶ່ງຄື ມາຮອດຈຸດນີ້ ເຮົາຕ້ອງເລືອກເອົາອັນໃດອັນໜຶ່ງໄດ້ແລ້ວ
ບໍ່ມີໃຜເກັ່ງໄປໝົດທຸກດ້ານ...
ເຄີຍໄດ້ຍິນຄຳເວົ້າທີ່ວ່າ "Jack of all trades, master of none" ບໍ່?
ແປຄວາມໝາຍອີກແບບກໍຄື "ຄົນເກັ່ງ ແຕ່ເກັ່ງຄືເປັດ"
ໃຫ້ລອງສັງເກດເບິ່ງເປັດ ເປັດຈະເປັນສັດທີ່ແປກ ມັນຮຽນຮູ້ໄດ້ຫຼາຍໆຢ່າງ ແຕ່ກະບໍ່ໄດ້ເກັ່ງຫຼາຍ ມັນສາມາດບິນໄດ້ ແຕ່ກະບິນບໍ່ເກັ່ງເທົ່ານົກ ມັນສາມາດລອຍນ້ຳໄດ້ ແຕ່ກໍລອຍບໍ່ເກັ່ງເທົ່າປາ ມັນສາມາດແລ່ນໄດ້ ແຕ່ກໍແລ່ນບໍ່ເກັ່ງເທົ່າໄກ່.
ແຕ່ເປັດກໍມີຂໍ້ດີຢູ່ຄືກັນເດີ້ ຖ້າເກີດມີໄພທຳມະຊາດມັນກໍສາມາດເອົາຕົວລອດໄດ້ໝົດ ຖ້າຫາກວ່ານ້ຳຖ້ວມ ໄກ່ກໍຕາຍ ແຕ່ເປັດກໍຍັງຢູ່ໄດ້ ແຕ່ຖ້ານ້ຳແລ້ງ ປາກໍຕາຍອີກ ແຕ່ເປັດກະຢູ່ໄດ້ຄືເກົ່າ ຫຼືຖ້າເກີດມີມົນລະພິດເທິງອາກາດ ນົກກໍຕາຍໝົດ ແຕ່ເປັດກໍຍັງຫຼົບອາກາດເປັນພິດຢູ່ເທິງດິນໄດ້.
ເຫັນບໍ່? ເປັດກະບໍ່ແມ່ນວ່າບໍ່ດີສະເໝີໄປ
ບາງເທື່ອຄຳຖາມທີ່ວ່າ ຢາກເປັນຫຍັງ, ມັກ ແລະ ຖະນັດຫຍັງ? ອາດຈະບໍ່ແມ່ນຄຳຖາມຂອງເຮົາ ແຕ່ເປັນຂອງ ນົກ, ປາ ແລະ ໄກ່ ພຸ້ນລະ.
ທຳອິດກໍຄິດກັບຕົນເອງວ່າ ເຮົາອາດຈະເປັນຄືເປັດກະໄດ້. ຈະຖາມວ່າເປັນເປັດດີບໍ່?
ກະດີສຳລັບເປັດທີ່ຍັງຄົ້ນຫາຕົນເອງຢູ່ ເພາະມັນຈະເຮັດໃຫ້ຄົນທີ່ຍັງບໍ່ເຫັນເປົ້າໝາຍຂອງຕົນເອງໄດ້ຄິດບວກໄວ້ກ່ອນ
ແຕ່ຖ້າໃຜທີ່ຄົ້ນພົບຕົນເອງໄດ້ແລ້ວ ກໍຍິນດີນຳ ໃຫ້ຕັ້ງໃຈ ແລະ ລົງມືເຮັດມັນຕອນນີ້ເລີຍໂລດ ກ່ອນຊິກັບມາຫຼາຍເລື່ອງອີກ 😆
