ລຸງຕັ້ງໃຈໄວ້ແຕ່ຕົ້ນປີແລ້ວວ່າຢາກເຮັດ ໂຄງການນີ້ ແຕ່ເນື່ອງດ້ວຍຫລາຍປັດໃຈເຫດຜົນໃຫ້ບໍ່ມີເວລາໄດ້ເລີ່ມຈັກເທື່ອ
ເຊິ່ງມາຮອດນີ້ລຸງກໍຍັງຢາກໃຫ້ມັນເກີດຂຶ້ນເຊິ່ງຮູບແບບທີ່ຄິດໄວ້ກໍແມ່ນ:
1 ຮັບບໍລິຈາກ ຄອມເກົ່າ ຄອມເພ ຄອມບໍ່ໄດ້ໃຊ້
2 ເອົາມາແປງ ມ້າງ ຫລື ປ່ຽນ ເອົາມາເຮັດໃຫ້ມັນໃຊ້ໄດ້
3 ຕິດຕັ້ງລະບົບປະຕິບັດການ Linux Desktop ອາດຈະເປັນ Lubuntu ແລະ ລົງ ໂປຣແກຣມທີ່ຕ້ອງໄດ້ໃຊ້ ແລ້ວກໍ ເກມຈຳນວນນຶ່ງໄວ້ໃຫ້ນ້ອງໆໄດ້ຫລິ້ນ
4 ຫາໂຮງຮຽນທີ່ຕ້ອງການມັນແທ້ໆ ອາດຈະໃຫ້ທາງໂຮງຮຽນເຮັດກິດຈະກຳຫລື ເຮັດຫນັງສືສະເຫນີມາ ແລ້ວເຮົາກໍເອົາໄປຕິດຕັ້ງໃຫ້ນ້ອງໆໄດ້ຫລິ້ນ,
ທັງຫມົດນີ້ລຸງບໍ່ໄດ້ຫວັງວ່າ ຈະໃຫ້ເອົາຄອມໄປຕັ້ງໄວ້ເພື່ອຮັກສາວ່າຢ້ານມັນເພ, ລຸງຢາກໃຫ້ນ້ອງໆໄດ້ຈັບຕ້ອງ ໄດ້ຫລິ້ນ ແລະໄດ້ສຳພັດ ເພື່ອໃຫ້ເຂົາລຶ້ງກັບມັນ ແລະອາດຈະເຮັດໃຫ້ບາງຄົນ ມັກແລະສົນໃຈມາສາຍໄອທີເລີຍກໍເປັນໄດ້ ສະນັ້ນເນັ້ນໃຫ້ເດັກນ້ອຍໄດ້ງົມ ຫາກມັນເພກະຄ່ອຍເອົາມາແປງລະກັນ,
ລຸງເລີຍຢາກຖາມສຽງຂອງທຸກຄົນທີ່ເຂົ້າມາອ່ານກະທູ້ນີ້ວ່າ: ຫາກທ່ານເປັນນັກສຶກສາ ຫລື ເປັນຄົນທີ່ພໍຈະມາຊ່ວຍວຽກໂຄງການນີ້ໄດ້ທ່ານຈະມາຊ່ວຍເຮົາໄດ້ບໍ່? ເຊິ່ງທີ່ຕ້ອງການຫລັກໆກໍມີດັ່ງນີ້:
1 ຄົນຕິດຕາມການບໍລິຈາກ ຫນ້າທີ່ຫລັກໆ ກໍແມ່ນ ເບິ່ງເລື່ອງສາງ ເກັບກຳບັນຊີຫມາຍເຖິງຄອມທີ່ຄົນເອົາມາບໍລິຈາກ ແລະ ການເຄື່ອນໄຫວຕ່າງໆເຊັ່ນ ເອົາອາໄຫລ່ຄອມນີ້ໄປໃສ່ຄອມນັ້ນປະກອບມາເປັນຄອມນີ້ ໃຫ້ຮູ້ໄດ້ເພື່ອແຈ້ງລົງຫນ້າເວັບໃຫ້ຜູ້ບໍລິຈາກໄດ້ຮູ້ນຳ,
2 ອາສາສະຫມັກ ແປງຄອມ ອັນນີ້ກໍຕາມນີ້ເລີຍ ມາຊ່ວຍມ້າງ, ປະກອບ ແລະ ລົງ Linux desktop ໃຫ້ມັນໃຊ້ໄດ້ ເຊິ່ງອັນນີ້ຈະເຫມາະກັບນັກສຶກສາທີ່ສົນໃຈ ແລະຢາກລອງຝຶກວິຊາໃນການສ້ອມແປງຄອມ.
3 ຜູ້ເບິ່ງແຍງເວັບໄຊ້ ເພຈ ເພື່ອອັບເດດຂ່າວຄາວແລະການເຄື່ອນໄຫວຕ່າງໆ
4 ເປັນຜູ້ບໍລິຈາກ ບໍ່ວ່າຈະບໍລິຈາກ ຄອມເກົ່າ, ອຸປະກອນໄອທີເກົ່າທີ່ທ່ານບໍ່ໄດ້ໃຊ້ ຫລື ບໍລິຈາກເວລາຂອງທ່ານໃນການຊ່ວຍກັນປະຊາສັມພັນໂຄງການ ຫລື ແນະນຳໃຫ້ຄົນຮູ້ຈັກໄດ້ຮູ້ກວ້າງອອກໄປ.
5 ສະຖານທີ່ ອັນນີ້ເຮົາຍັງຕ້ອງການ ສາງສຳລັບມ້ຽນເຄື່ອງທີ່ມາບໍລິຈາກເພື່ອລໍຖ້າການສ້ອມແປງ ຫາກບໍມິກໍຈະຫມູນໃຊ້ ສາງຂອງ Homeofdev ໄປກ່ອນ
6 ຜູ້ອອກໄອເດຍ ທ່ານສາມາດອອກໄອເດຍຫລືມີຄຳເຫັນກັບໂຄງການນີ້ວ່າຢາກໃຫ້ມີຫຍັງແດ່ ແລ້ວເຮົາຈະມາປຶກສາກັນຕື່ມພາຍຫລັງ
ໂຄງການນນີ້ບໍ່ຮັບບໍລິກຈາກເປັນເງິນເຮົາຈະຮັບແຕ່ຄອມຫລືອາໄຫລ່ຄອມທີ່ເຮົາຕ້ອງການເທົ່ານັ້ນ
ດັ່ງນັ້ນຈຶ່ງຂຽນກະທູ້ນີ້ມາເພື່ອຢັ່ງເບິ່ງວ່າຈະມີຄົນທີ່ສົນໃຈມາຊ່ວຍຫຍັງນຳແດ່ເພາະລຸງຄົນດຽວ ຄົງເຮັດບໍ່ໄຫວ
ຫາກທ່ານສົນໃຈຈະຮ່ວມປະກອບສ່ວນອັນໃດ ກໍລົງຊື່ເຈດຈຳນົງໄວ້ໃນກະທູ້ນີ້ເລີຍເດີ
ຮັກແພງຫລານໆ
ລຸງໂອ້ດ
